BMG-niň Baş Assambleýasynyň Kararnamasyna laýyklykda, 2026-njy ýyl Halkara öri meýdanlarynyň we maldarçylykda meşgullanýanlaryň ýyly diýlip yglan edildi. Garagum sährasynyň öri meýdanlaryna esaslanýan maldarçylyk pudagy üçin bu başlangyç Türkmenistanda strategik ähmiýete eýedir.
Häzirki wagtda ýurduň döwlet syýasaty özboluşly tebigaty çölleşmeden goramaga gönükdirilendir. Alymlaryň bellemegine görä, maldarçylygyň we düýedarçylygyň durnukly ösmegi göni iým binýadynyň hiline baglydyr. Ony gorap saklamak bolsa adaty tejribe bilen häzirki zaman ekologiýa tehnologiýalarynyň utgaşmagyny talap edýär.
Çöller, ösümlik we haýwanat dünýäsi milli institutynyň hünärmenleri öri meýdanlaryny dikeltmek boýunça çäreleriň toplumyny işläp düzdüler. Bu işde fitomeliorasiýa we sazak tokaýlyklarynyň gerimini giňeltmek, aýratyn-da «Altyn asyr» Türkmen kölüniň täsir edýän zolagynda bu işleri alyp barmak möhüm orun tutýar.
Çöl ösümlikleriniň emeli usulda ekilmegi we suw serişdeleriniň tygşytly ulanylmagy ekoulgamy tebigy usulda sagdynlaşdyrmaga mümkinçilik berýär. GIS-tehnologiýalaryň we hemra gözegçiliginiň ulanylmagy alymlara öri meýdanlarynyň iým sygymyny takyk hasaplamaga we biologik köpdürlülege zeper ýetirmezden mal bakyşyny meýilleşdirmäge kömek edýär.
Alysda ýerleşýän öri meýdanlaryny suwlandyrmaga aýratyn üns berilýär. Guýularyň, kärizleriň we ýagyş suwuny ýygnaýan sardobalaryň dikeldilmegi ozal ulanylmadyk millionlarça gektar meýdanlara ýol açýar. Demirgazyk-Günbatar Türkmenistanda geçirilen barlaglar suw ýataklaryň döwrebaplaşdyrylmagynyň we gyşky agyllaryň abadanlaşdyrylmagynyň mal sanyny artdyrmaga, şol bir wagtyň özünde ulag çykdajylaryny azaltmaga ýardam edýändigini tassyklaýar.
Şeýle ylmy esaslandyrylan maslahatlar üýtgeýän howanyň şertlerinde ykdysady bähbitler bilen daşky gurşawy goramagyň arasyndaky deňagramlylygy saklap, ýurdumyzyň maldarçylyk pudagynyň ornuny berkitmäge kömek edýär.

HHM